POVO NIA LIAN - MAROMAK NIA LIAN

Dungannon-Ema hotu la hein katak Eleisaun Parlamentar Antecipadas atu mosu iha 2018. Ita la hein katak Eleisaun Parlamentar Julho 2017 lori tan krize politika dala ida tan mai Timor Leste. Krize ne'e hatudu mo-mos katak, ita iha krize de LIDERANSA. Ita iha krize kona ba "marketing politic", ita mos la asertivu kona ba hili termu wainhira voto la determina se mak manan eleisaun: Inklusaun, Koligasaun ka Insidensia Parlamentar? Historia hanorin ona katak CNRT ukun tinan sanulu ho partidu barak la hetan krize tan ba uza termu: Koligasaun.

Iha eleisaun ida ne'e, Partidu Politiku/Koligasaun sira (PEP, PD, PR, PF, MSD, MDN, FDD no AMP) kumpre ona sira nia obrigasaun, lori programa politiku ba apresenta ba povo husi lidun ba lidun durante fulan ida nia laran. Balu halo komisio nebe halibur ema rihun, seluk halo dialogo no dor-to-dor campaign. Agora knar tomak iha CNE/STAE, Polling Staff, Fiskais no Polisia sira nia liman.

Ema barak bolu kampanha ne'e hanesan FESTA DEMOKRASIA, seluk bolu VIVENSIA DEMOKRATIKA, seluk tan uza biban ne'e atu halo VIOLENSIA FISIKA no VIOLENSIA VERBAL hasouru ema inosente sira (feto, mane, katuas, ferik, klosan no labarik) nebe expressa sira nia liberdade liu husi kor ruma. Ida ne'e mak retratu foer, ita hasai husi kampanha eleitoral ida ne'e. 

Ohin, responsabilidade tomak entrega ba CNE/STAE, Polling Staff no Fiskais sira iha Timor Leste tomak no Diaspora atu hatudu ba mundu, liu husi observador internasional sira, dala ida tan katak ita hamutuk bele organiza eleisaun ida livre, kredivel no transparente hanesan mos eleisaun rua iha tinan kotuk: Eleisaun Presidensial no Eleisaun Parlamentar 2017 nebe hetan kredito pozitivu.  

Rona tiha partidu sira durante fulan ida, Timor Oan ida-idak sei hakat ba fatin votasaun iha 12 de Maio 2018 atu koalia liu husi votasaun, hili tuir ida-idak nia konsiensia, Partidu nebe mak merese liu Timor oan ida-idak nia votu? Lider ida nebe mak iha kbi'it naton atu bele garante PAZ, ESTABILIDADE, MUDANSA NO PROGRESSU? Lider ida nebe bele tau lei no ordem iha leten, defende riku-soin, tane a'as Timor Oan nia DIGNIDADE no labele kompara sira ho foz ka supermi.  

Iha Norte Irlanda, Eleisaun Parlamentar Antesipadas (EPA) ida ne'e importante ba Timor Oan sira nebe hela no servisu iha ne'e atu exerse sira nia direitu nudar cidadaun, nudar Timor Oan ba dala uluk. Eleisaun ida ne'e mos laos deit fanu Timor Oan sira atu preokupa ho Estabilidade Politika rai laran ka afirma-an iha kor partidaria ruma, maibe halo sira hanoin hikas fali fatin nebe sira moris ba; halo sira hanoin fali uma lisan, uma knua, uma lulik, tais, Tetum, historia, ai-han no riku-soin tomak. 

Timor Oan nain 1287 mak sei hi'it-an husi Monaghan, Lurgan, Craigavon, Portadown, Cookstown no Belfast ba vota iha cidade Dungannon. Tuir lei, fatin votasaun la autoriza seguransa partidaria...ema nebe laos membro ka funsionario CNE/STAE sei hamri'ik do'ok metru 100 ida husi centru votasaun...lia sakat ruma nebe CNE/STAE labele resolve ho lia fuan, sei entrega ba autoridade kompetente PSNI nebe disponivel ona atu transmite tranquilidade no seguransa ba votante sira molok, durante  no depois  kontajen de votos. Polling Staff no Fiskais sira hetan ona formasaun adequada no preparadu ona hodi ajuda eleitor sira ba tesi-lia ba Timor nia futuro liu husi votasaun. 

Mai ita hotu hakilar ho aten barani ba politiku sira katak respeita resultadu Eleisaun Parlamentar Antesipadas ida ne'e basa: POVO NIA LIAN - MAROMAK NIA LIAN {Vox Populi, Vox Dei}