MENSAGEN HUSI PORTA VOZ AMP

Inan no Feton ho Maun no Alin sira iha rai tasi balun:

Inglaterra, Irlanda do Norte, Australia, Portugal ho Koreia do Sul.

Saudacoes Combativas husi Timor Leste.

Timor hau nian, imi nian no ita hotu nian. Iha nebe deit ita hela ba, moris no servisu ba, ita nunka fila kotuk ba ita nia rain; rai nebe ita husar talin kotu ba, no rai nebe ita sei horik loron ida no ba nafatin rohan laek.

Hanesan ne'e iha tempo uluk, agora no aban bainrua. Hanesan ne'e iha tempo at no diak. Hanesan ne'e mos iha tempo funu no paz.

Ohin iha ita rain ami prepara-an makas no lai los atu fo dala ida tan, ami nia kontribuisaun ba festa demokrasia ou Eleicoes Parlamentares Antecipadas.

Maibe ami mesak la kompletu. Karik kapas no furak liu tan, se imi participa no kontribui mos! Hanesan iha tempo luta ba Independencia ninian, ita hamutuk hetan ona ita nia Ukun Rasik-an no agora hamutuk fali ho IMI mak Ita sei forte liu tan.

Tamba ne'e, hau, imi nia belun no kompanheiro, TAUR MATAN RUAK, husu hodi AMP nia naran atu imi, labele falta iha centru de votasaun nebe besik atu exerce imi nia direito hodi vota ba AMP, nebe sei akontese iha dia 12 de Maio 2018.

Labele haluha:ita bele lakon, se maluk balun haluha la ba vota iha loron importante ida ne'e! Buka malu ba, aviza malu ba, hotu-hotu, rame-rame ba vota ba Timor Leste ninia futuro no futuro ita hotu nian!

Hamutuk ho IMI, Ita hametin Nasaun.

Longe da vista mas perto do meu coracao ou Jauh di mata tapi dekat di HATIKU.

GOD BLESS YOU ALL

adeus

TAUR MATAN RUAK