NOTA EDITORIAL

Estimados leitores AMP

Antao Aparicio Guterres

Koordenador AMP Norte Irlanda

Estrutura Aliansa ba Mudansa no Progresso (AMP) iha Norte Irlanda kria blog ne’e ho objetivo atu fahe informasaun ba militantes, simpatisantes no publiku liu husi: texto, data, imagem, video no atributos sira nebe liga ba atividade AMP nian iha Norte Irlanda antes, durante no depois kampanya ba Eleisaun Parlamentar Antesipadas (EPA) no mos atividade seluk AMP halo iha Norte Irlanda. Akompanya mos ami Facebook no Youtube.

Impasse politiku nebe mosu durante ne’e laos deit halo lider politiku sira preokupadu maibe povu Timor laran tomak nune’e mos Timor Oan sira nebe hela iha diaspora tuur la hakmatek. Hot-hotu buka halibur malu tau hanoin hamutuk hodi hatan lalais ba krize politika ne’e, liu husi halo resenceamentu, atualiza kartaun eleitoral hodi ba tuir votasaun iha 12 de Maio 2018 hodi fo vitoria esmagadora ba AMP.

Hau, imi no ita hotu fiar katak so AMP deit mak bele assegura Paz no Estabalidade iha ita nia rain doben Timor Leste; AMP deit mak bele louva, honra no tane Povu nia dignidade nudar ema no nudar Timor Oan; AMP deit mak bele fo no garante liberdade de expressaun; AMP deit mak bele tane as kultura no lisan povu Timor nian; AMP deit mak bele hametin unidade no hadia Estadu de Direitu Demokratiku no defende ho laran moos riku-soin Timor Oan tomak nian nebe ema balun hakarak penor ba ema seluk durante tinan barak nia laran.

Wainhira manan tiha Eleisaun Parlamentar Antesipadas, Aliansa Mudansa ba Progresso iha Norte Irlanda hakarak propoen ba estado loke konsuladu RDTL hodi tau matan no hatan ba necessidades Timor Oan tomak nebe hela iha ne'e. Sei kria mos organizasaun ida hodi promove kultura Timor no lian ofisial ba gerasaun foun Timor Oan nebe hela iha Norte Irlanda, nune’e loron ruma fila ba Timor labele sai fali ema estrangeiro iha sira nia rain rasik.

Mai Ita Hamutuk Hametin Nasaun

Obrigado barak

Antao Aparicio Guterres

Koordenador AMP Norte Irlanda